O blog do Club de Ciencias 2025-26

 

O noso horto: un proxecto que medra con nós

Comezamos un novo curso e, con el, retomamos un dos proxectos máis queridos do club de ciencias: o horto escolar. O ano pasado puxemos as bases, preparando a terra, delimitando as zonas de cultivo e iniciando o noso propio compost, que seguimos alimentando cada semana cos restos orgánicos do cole.

Este curso demos un paso máis e xa temos as primeiras plantacións en marcha. No noso horto medran:

• Leitugas — rápidas, agradecidas e perfectas para aprender os primeiros coidados.

• Porros — un cultivo que require paciencia, pero que nos axuda a observar a evolución das plantas a longo prazo.

• Acelgas — fortes e resistentes, ideais para traballar en equipo.

• Aromáticas como o romeu — que atraen polinizadores e perfuman todo o espazo.

• Romanesco — unha das novidad es deste ano, coa súa forma fractal que sempre esperta curiosidade no alumnado.

Ademais, continuamos co noso composteiro, un dos elementos clave do proxecto. Grazas a el aprendemos sobre reciclaxe, ciclos naturais e sustentabilidade, convertendo os restos orgánicos en abono para as nosas propias plantas.

O horto non é só un espazo verde: é un laboratorio ao aire libre onde observamos, experimentamos e descubrimos como funciona a natureza. E isto non fixo máis que empezar.